तानसेनसहित पाल्पाका जनप्रतिनिधिले काम थाले

पाल्पा, असार २०– पाल्पाको जिल्ला सदरमुकाम तानसेनसहित १० वटा स्थानीय तहका जनप्रतिनिधिहरुले पदभार सम्हाल्न सुरु गरेका छन् ।


तानसेन, रामपुर नगरपालिका प्रमुख\उपप्रमुख र ८ वटा गाउँपालिकाका अध्यक्ष\उपाध्यक्षहरुले सपथग्रहणसँगै पदभार ग्रहण गरेका हुन् । जिल्लाका ८१ वटा वडाका वडाअध्यक्ष, वडासदस्यहरु गरी ४ सय २५ जनाले स्थानीय सरकारको नेतृत्व लिएका छन् ।


तानसेन नगरपालिकाको नेतृत्व सम्हालेपछि नगरप्रमुख अशोक कुमार शाहीले तानसेनलाई समृद्ध र सुन्दर सहरको रुपमा विकास गर्ने बताउनुभयो । विस्तारित तानसेनको विकासका लागि आवश्यकता र औचित्यताका आधारमा कार्यक्रम तथा बजेट विनियोजन गरिने बताउँदै समानुपातिक विकासलाई प्राथमिकता दिन्छौँ भन्नुभयो । प्राकृतिक, सांस्कृतिक र ऐतिहासिक नगरलाई व्यवस्थित गरी पर्यटनको गन्तव्यस्थल बनाउने नगरप्रमुख शाहीको जोड छ । तानसेन नगरपालिकाको पहिलो बैठकले सुशासनका लागि नगरपालिकाका सम्पूर्ण खर्च भुक्तानीलाई २४ घण्टाभित्र सार्वजनिक गर्ने निर्णय गरेको छ । प्रमुख शाहीले तानसेनका नगरसडकका खाल्डाखुल्डी पुर्न कर्मचारीहरुलाई निर्देशन दिनुभयो ।


पदभार ग्रहण गर्दै रामपुर नगरपालिकाका प्रमुख रमणबहादुर थापाले रामपुरलाई व्यापारिक र आर्थिक केन्द्रको रुपमा विकास गर्ने बताउनुभयो । उहाँले एक घर एक धारा, एक सेफ्टी ट्यांकी र सफा नगर बन्ने विश्वास व्यक्त गर्नुभयो । नगरप्रमुख थापाले जनताको विश्वासलाई पूरा गर्न आफूहरु सक्रिय रहने बताउनुभयो ।
तिनाउ गाउँपालिकाका नवनिर्वाचित अध्यक्ष ओमबहादुर घर्तीले तिनाउभित्रका प्राकृतिक स्रोत खनिज पदार्थ, वनजंगल र पानीको परिचालन गरी जनताको जीवनमा सुधार ल्याउने बताउनुभयो । उहाँले चुरे क्षेत्रको संरक्षणमा विशेष ध्यान दिने बताउनुभयो । माथागढी गाउँपालिकाका अध्यक्ष सन्तोष थापा मगरले कृषि र पशुपालनमा समुदायको सहभागिता वृद्धि गर्ने बताउनुभयो । बगनासकाली गाउँपालिकाका अध्यक्ष कृष्णप्रसाद बस्याल, रैनादेवी छहराका अध्यक्ष रामबहादुर कार्की, रिब्दीकोटका अध्यक्ष नारायण जीसी, निस्दीका अध्यक्ष मुक्तबहादुर सारु, पूर्वखोलाका अध्यक्ष नुनबहादुर थापा र रम्भाका अध्यक्ष विष्णु भण्डारीले स्थानीय सरकारले जनताको भावना अनुसार काम गर्ने बताउनुभयो ।


मुख्य निर्वाचन अधिकृत एवम् जिल्ला न्यायधीश भरतमणि खनालले शान्तिपूर्ण निर्वाचनबाट जनप्रतिनिधि चुनिएर आएको अब विकासका रेखाहरु कोरिने विश्वास व्यक्त गर्नुभयो ।

 

तीन महिनामा सोह्र हजारले स्वास्थ्य विमा गरे

पाल्पा, वैशाख १– स्वास्थ्य विमा कार्यक्रममा सहभागी हुने संख्या पाल्पामा आशा गरेभन्दा राम्रो देखिएको छ ।

सरकारले २ हजार ५ सय रुपैँयाको स्वास्थ्य विमा कार्यक्रमबाट ५० हजार रुपैँयाको उपचार खर्च दिने अभियान गाउँगाउँसम्म लगेपछि विमा गराउनेको संख्या बढेको छ । पाल्पामा ३ महिनाको अवधिमा १६ हजार व्यक्तिले स्वास्थ्य विमा गराएका छन् । चार महिनाको अवधिमा दश हजार मानिसको स्वास्थ्य विमा गर्ने लक्ष्य लिएकोमा लक्ष्यभन्दा बढी १६ हजार मानिसले स्वास्थ्य विमा गराएको सामाजिक स्वास्थ्य विमा समिति पाल्पाले जनाएको छ ।

समितिका प्रवन्धक मनोज पौडेलले १६ हजार विमा गरेका मानिसहरूमध्ये ६ हजार व्यक्तिले विमा मार्फत् उपचार सेवा लिन सक्ने भएका छन् । उहाँका अनुसार विमा गर्ने १६ हजार पुग्ने भए तापनि बैशाख १ गतेदेखि १० हजार व्यक्तिले मात्र विमा मार्फत् उपचार सेवा पाउने छन् । यहाँ बैशाख १ गते देखि ८ वटा स्वास्थ्य सेवा संस्थाहरूले विमाको उपचार सेवा प्रदान गर्ने छन् । यस यघि ६ वटा संस्थाले मात्र उपचार सेवा दिदै आएकोमा मिशन अस्पताल र लायन्स लाकौल आँखा अस्पतालले पनि सेवा दिन थालेका छन् । आगामी एक वर्षको अबधिमा ५० हजार पाल्पाका मानिसलाई स्वास्थ्य विमा गर्ने अनुमान गरिएको प्रबन्धक पौडेलले जानकारी दिनुभयो ।

लुम्विनी मेडिकल कलेजबाट ९ सय जना, रामपुर अस्पतालबाट ९० जना, जिल्ला अस्पतालबाट ६० जना, ताहुँ प्राथमिक स्वास्थ्य केन्द्रबाट ५० जना, खस्यौली प्राथमिक स्वास्थय केन्द्र ६४ जना, लुम्बिनी अञ्चल अस्पतालबाट १६ जना गरी हालसम्म ११८० जना उपचार सेवा लिएका छन् । सेवा लिने व्यक्तिहरूले स्वास्थ्य विमाप्रति सकारात्मक प्रतिक्रिया दिएको विमा कार्यक्रमका फोकल पर्सन गौरीशंकर सिंहले बताउनुभयो । उहाँले विमाको लागि हालसम्म ५५ लाख रुपियाँ बैँकमा जम्मा गरिएको हालसम्म ११८० जना बाट ६ लाख १० हजार रुपियाँ खर्च भएको छ ।

जिल्लामा विमा कार्यक्रम सफल बनाउन गाउँगाउँमा रहेका ८३ जना स्वयसेवीहरू खटिएका छन् । सरकारले देशका विभिन्न ८ वटा जिल्लामा स्वास्थ्य विमा कार्यक्रम गरेको छ । विपन्न नागरिकलाई स्वास्थ्य सेवा सहज रुपमा प्रदान गर्नका लागि स्वास्थ्य विमा कार्यक्रमको सुरुवात गरिएको हो ।

वडाअध्यक्ष छनौटका लागि दलहरु सक्रिय

पाल्पा, चैत्र ३१– स्थानीय तहको निर्वाचनमा उमेदवार बन्न राजनीतिक दलका नेताहरू तल्ला कमिटीका बैठक र भेलाहरुमा पुगेका छन् ।


राजनीतिक दलहरूले उमेदवार छनौटको सिफारिश गर्न तल्ला कमिटीहरुलाई जिम्मेवारी दिएकाले नेताहरु गाउँ र टोलका बैठकसम्म पुगेका हुन् । दलहरुले उमेदवारको मापदण्ड बनाए तापनि राजनीतिक योगदान गरेको र जनताबीच स्थापित नेता रोज्ने क्रम प्रायः सबै पार्टीहरुमा चलेको देखिन्छ । पार्टीका केन्द्रीय तहका एक सरो नेताहरुसमेत जिल्लामा आएर निर्देशन दिने काम सकेका छन् । ्


नेपाली काँग्रेसका जिल्ला सचिव झपेन्द्र गैरेले बैशाख २ गतेसम्म जिल्लामा नाम पठाउन निर्देशन दिइएको र १्\२ वटा वडामा सर्वसम्मत उमेदवार छनौट भएको बताउनुभयो । काँग्रेसले आधिकारिक पत्र आएपछि नाम सार्वजनिक गर्ने जनाएको छ । नेकपा एमालेका जिल्ला अध्यक्ष नारायण आचार्यले वडा कमिटीबाट सर्वसम्मत र प्रस्तावित वडाअध्यक्षको सिफारिश प्राप्त भइरहेको जानकारी दिनुभयो । नेकपा माओवादी केन्द्रले बैशाख ५ गतेसम्म वडाअध्यक्षको सिफारिश गर्ने समय दिएको र आन्तरिक छलफल भइरहेको जिल्ला संयोजक गीरबहादुर थापाले बताउनुभयो ।


पाल्पा जिल्लामा नेकपा एमालेले उमेदवारको सूची तयार गर्ने काममा अगाडि देखिन्छ । स्थानीय तहका ८१ वडा मध्ये ३५ वटामा एमालेले वडाअध्यक्षको उमेदवार सर्वसम्मत रुपमा छनौट गरेको छ । तानसेन नगरपालिकाको वडा ४ बाट वसन्त जीआर, वडा नं ११ बन्दिपोखराबाट दामोदर घिमिरे, वडा नं १३ बौघापोखराथोकबाट देवेन्द्र राना एमालेको वडाअध्यक्षको उमेदवार बन्ने निश्चित भएको छ । तानसेनकै अन्य वडाहरुमा धेरैबाट एक उमेदवार खोज्ने प्रयास भइरहेको एमालेले जनाएको छ । रामपुर नगरपालिकाको वडा नं १ मा मित्रलाल कडेंल, वडा नं ९ खालीवनमा इच्छाराम सिंजाली एमालेको उमेदवार बन्ने निधो भएको छ ।


एमालेले रिब्दीकोट गाउँपालिकाका ७ वटै वडामा वडाअध्यक्षका उमेदवार तय गरेको छ । वडा नं १ ख्याहाबाट दिवाकर पराजुली, वडा नं २ देउरालीबाट रामचन्द्र नेपाल, वडा नं ३ खस्यौलीबाट विष्णु खनाल, वडा नं ४ भैरवस्थानबाट दुर्गा खनाल, वडा नं ५ कुसुमखोलाबाट कृष्ण बहादुर थापा, वडा नं ६ ठिमुरेबाट तुलबहादुर जीसी र वडा नं ७ पालुङमैनादीबाट तील बहादुर रास्कोटीको नाम सिफारिश भएको छ ।


रैनादेवी गाउँपालिकामा वडा नं १ सिद्देश्वरबाट ओमबहादुर दर्लामी, वडा नं २ सोमादीबाट चन्द्रकान्त पोखरेल, वडा नं ३ मुझुङबाट कृष्णबहादुर अर्घाली, वडा नं ७ बल्ढेङगढीबाट कुलबहादुर खड्का, वडा नं ८ सत्यवतीबाट रेमबहादुर रानाको नाम वडाध्यक्षमा सर्वसम्मत सिफारिश भएको छ । यसैगरी माथागढी गाउँपालिका वडा नं १ चिदीपानीबाट पूर्णबहादुर सारु, वडा नं ४ झडेवाबाट शंकर दर्लामी, वडा नं ५ गोठादीबाट चेतबहादुर थापा, वडा नं ६ माथागढीबाट यमबहादुर गाहा वडाध्यक्षमा सर्वसम्मत सिफारिश भएको एमालेले जनाएको छ ।


रम्भा गाउँपालिका वडा नं २ फोक्सिङकोटमा उमानसिं सारु, वडा नं ३ पीपलडाँडाबाट बुद्ध सूर्यवंशी, वडा नं ४ हुमिनबाट भोज बहादुर बिक, पूर्वखोला गाउँपालिका ६ हेक्लाङबाट मन बहादुर सारु, निस्दी ३ झिरवासबाट लक्ष्मी प्रसाद पाटा, तिनाउ गाउँपालिका १ कचलबाट रोमबहादुर लम्तरी, वडा नं ४ कोलडाँडाबाट लालबहादुर दर्लामी, वडा नं ६ मस्यामबाट गोपाल जीसी एमालेका वडाअध्यक्षका उमेदवार छनौट भएका छन् ।

 

पाल्पामा चुनावी लहर बढ्याे

पाल्पा, चैत्र ३० आगामी वैशाख ३१ गते हुने स्थानीय तह निर्वाचनका लागि पाल्पामा चुनावी सरगर्मी बढ्दै गएको छ ।

नेपाली कांग्रेस, नेकपा एमाले, नेकपा माओवादी केन्द्रका नेता कार्यकर्ता, सामाजिक व्यक्तित्व, संचारकर्मीलगायतले निर्वाचनको वातावरण बढाउन सघाएका छन् । राजनीतिक दलका कार्यकर्ता गाउँ शहरदेखि सामाजिक सञ्जालमा भोट माग्दै अभियान सञ्चालन गरिरहेका छन् ।

 

पार्टीमा नयाँ सदस्य प्रवेश गराएको कुरालाई महत्व दिएर फेसबुकमा लेखेका छन् । गाउँमा भेला, गोष्ठी, छलफल, कार्यकर्ता प्रवेशका कार्यक्रम भइरहेका छन् । चुनावको मिति नजिकिएसँगै उम्मेद्वारी दाबी गर्ने पनि बढ्दै गएका छन् ।आठ गाउँपालिका र दुई नगरपालिका रहेको पाल्पामा  गाउँ, नगर र वडामा उम्मेद्वारी घोषणा गर्नेहरु धेरै छन् । कांग्रेस, एमाले, माओवादी केन्द्र, राप्रपा, जनमुक्ति, जनमोर्चा लगायतका दलहरू यतिखेर प्रचारप्रसारमा अगाडि छन् ।

 

दलको तयारी

नेपाली कांग्रेसले पार्टीमा योगदान गरेका र नागरिकसँग लोकप्रिय उम्मेद्वारलाई प्राथमिकता दिने जिल्ला सभापति वीरबहादुर रानाले जानकारी दिनुभयो । गाउँ जागरण अभियान सुरु गरेको कांग्रेसले ग्रामीण क्षेत्रमा पनि कार्यकर्ता भेटघाट थालेको छ । नेकपा एमालेले संगठन कमिटीको नाममा पुनर्संरचित गाउँ तथा नगरमा संरचना बनाएको छ । हप्तादिनमा उम्मेद्वार चयन गर्ने बताएको एमालेले तोकेको मापदण्डअनुसार प्राथमिकता क्रम निर्धारण गरेर टिकट प्रदान गर्ने जिल्ला अध्यक्ष नारायण आचार्यले बताउनुभयो । नेकपा माओवादी केन्द्रले आन्तरिक प्रतिस्पर्धा र मनमुटाव बिना उम्मेद्वारको घोषणा अन्तिम अवस्थामा रहेको बताएको छ । सूची समय आएपछि निर्णय सार्वजनिक गर्ने माओवादी केन्द्रका संयोजक गीरबहादुर थापाले जानकारी दिनुभयो । पाल्पामा राप्रपा, राष्ट्रिय जनमुक्तिपार्टी, जनमोर्चा लगायत अन्य पार्टीले पनि उम्मेद्वारबारे छलफल भइरहेको बताएका छन् ।

एमाले पाल्पाले अध्यक्ष नारायणप्रसाद आचार्यको संयोजकत्वमा ८३ सदस्यीय स्थानीय तह चुनाव परिचालन कमिटी गठन गरेको छ । चुनाव परिचालन कमिटीमा जिल्ला कमिटीका पदाधिकारी तथा सदस्यहरु तथा १० वटै स्थानीय तहका पार्टी कमिटी सचिवहरु रहेका छन् ।कांग्रेस बैठकले पार्टी सभापति वीरबहादुर रानाको संयोकत्वमा महासमिति सदस्य, महाधिवेशन प्रतिनिधि, भातृ तथा शुभेच्छुक संस्थाका प्रमुख रहेको चुनाव परिचालन समिति गठन गरेको छ । २८ गते सबै गाउँपालिका र नगरपालिकाको केन्द्रमा सम्पर्क कार्यालय स्थापना गरेको छ । माओवादी केन्द्र उमेदवारको सूची लिएर अरुसँग तालमेलका लागि छलफल थालेको छ  ।

ककस्को चर्चा

राजनीतिक गतिविधिको केन्द्रमा रहेको सदरमुकाम तानसेन नगरपालिकामा सबैभन्दा धेरै आकांक्षी देखिएका छन् । बीस वर्षपछि निर्वाचन हुन लागेकाले गाउँपालिकामा पनि आकांक्षीहरु धेरै छन् ।

तानसेन नगरपालिका

  •        नेपाली कांग्रेस: अजयमान कर्माचार्य, सन्तोषलाल श्रेष्ठ, राजेन्द्र गोपाल सिंह, हिमालदत्त श्रेष्ठ, चकोरमान शाक्य
  •         नेकपा एमाले: अशोककुमार शाही, एकप्रसाद भण्डारी, डा. पुरन बज्राचार्य
  •         नेकपा माओवादी केन्द्र: नेत्रप्रसाद पाण्डेय, प्रेमसागर शाही, विन्दु रावल र नविन थापा ।
  •      राप्रपा: भीमसेन कार्की, चमेली देवी श्रेष्ठ, सदिशमान श्रेष्ठ, राधा रायमाझी, रेवन्त बहादुर बिष्ट
  •        राष्ट्रिय जनमुक्ति पार्टी: खुमबहादुर सिंजाली, बिष्णुमाया थापा ।

रामपुर नगरपालिका

  •         नेपाली कांग्रेस: रमण थापा, ज्ञानबहादुर गाहा, नेत्रप्रसाद भट्टराई, कृष्णप्रसाद अधिकारी ।
  •        नेकपा एमाले: राजुप्रसाद श्रेष्ठ, युवराज खनाल, बासुदेव देवकोटा ।
  •        नेकपा माओवादी केन्द्र: कमल भट्टराई, जितबहादुर थापा (हिरा) ।
  •        राप्रपा: शोभा केसी र ज्ञानबहादुर सिंजाली ।

निस्दी गाउँपालिका

  •          कांग्रेस: खामबहादुर सोमै र पूर्णबहादुर खाँड ।
  •          एमालेः मुक्तबहादुर सारु, देवीलाल लामिछाने
  •         माओवादी केन्द्रः बलु गैरे, नवलकुमार बयम्वु ।

पूर्वखोला गाउँपालिका

  •         कांग्रेस: कृष्ण पौडेल, झमन राजमगर र अनिरुद्र खनाल ।
  •          एमालेः नुनबहादुर थापा, राजेन्द्रलक्ष्मी गैरे
  •         माओवादी केन्द्रः प्रेम गैरे, भीमबहादुर सारु ।

रम्भा गाउँपालिका

  •          कांग्रेस: विष्णु थापा, विश्व अर्याल, विष्णु बमरेल
  •         एमालेः कालीदास श्रेष्ठ, विष्णु भण्डारी र उर्मिला शर्मा ।
  •          माओवादी केन्द्रः अर्जुनकुमार श्रेष्ठ, सुबी विकर कल्पना केसी ।

माथागढी गाउँपालिका

  •          कांग्रेस: सन्तोष थापा, रामेश्वर पन्थी
  •          एमालेः विमलप्रसाद काफ्ले र यमबहादुर चिदी ।
  •          माओवादी केन्द्रः हरि चौहान, नवल श्रेष्ठ, टीका काफ्ले
  •         राप्रपा: पदम राना, छकलाल चौहान, बेदकुमारी गाहा ।

बगनासकाली गाउँपालिका

  •         कांग्रेस: कृष्णप्रसाद बस्याल, सुनिता अधिकारी ।
  •          एमालेः देवीप्रसाद बस्याल, कमल पाण्डेय, मोहन थापा, हरि पाठक
  •          माओवादी केन्द्रः कृष्ण भुसाल, खुमबहादुर विक
  •         राप्रपा: बिष्णु पाण्डे, लक्ष्मण सिं राना ।

तिनाउ गाउँपालिका

  •         कांग्रेस: जुद्धबहादुर थापा, महेन्द्र पाण्डेय र लालबहादुर थापा ।
  •         एमालेः ओमबहादुर घर्ती मगर, लक्ष्मण थापा र दलबहादुर गुरुङ ।
  •          माओवादी केन्द्रः चक्रबहादुर थापा, राजेश श्रेष्ठ

रिब्दीकोट गाउँपालिका

  •          कांग्रेस: हिराधर आचार्य, गोविन्द आचार्य, गोविन्द पोखरेल
  •         एमालेः नारायणबहादुर जिसी, चिरञ्जीवि पोखरेल
  •          माओवादी केन्द्रः नविन वली, मिरा राना, आशिष दुधराज ।
  •          राप्रपा: भोजेन्द्रबहादुर कुँवर, नारायण बहादुर कुवर।

रैनादेवी छहरा गाउँपालिका

  •          कांग्रेस: रामबहादुर कार्की,बिष्णु पोखरेल, ओम प्रसाद पोखरेल
  •          एमालेः रामबहादुर राउत, झलक रायमाझी
  •          माओवादी केन्द्रः फर्स बहादुर खाम्चा, तुलाराम गरम्जा, राम बहादुर गरम्जा

सैनिक दिवसका अवसरमा पाल्पामा विविध कार्यक्रम

पाल्पा, १३ फागुन – सेना दिवसका अवसरमा चण्डीप्रसाद गण पाल्पाले विभिन्न कार्यक्रम आयोजना गरेको छ ।

 

गणले तानसेन टुँडिखेलमा रक्तदान कार्यक्रम गरेको छ । दमकडा माविमा अध्ययन गर्ने दृष्टिविहीनलाई खेलकुद सामग्री हस्तान्तरण गरेको छ । दृष्टिविहीन विद्यार्थीहरुलार्य एक छाक भोजन गराएको छ ।


तानसेन टु“डिखेलमा आयोजित रक्तदान कार्यक्रममा नेपाली सेना, निजामती कर्मचारी गरी १६ पिन्ट रगत संकलन भएको चण्डीप्रसाद गणले जनाएको छ । संकलित रगत लुम्विनी मेडिकल कलेजमा रहेको ब्लड बैंकमा पठाइएको चण्डीप्रसाद गणका मेजर मनोज डंगोलले बताउनुभयो ।

 

सेनाले दमकडा माविमा अध्ययन गर्ने ३० जना दृष्टिविहिन विद्यार्थीलाई खेलकुदका सामग्री हस्तान्तरण गरेको छ । गणपति दीर्घबहादुर चन्द, मेजर मनोज डंगोलले छात्रछात्राहरुलाई क्रिकेट खेल्नका लागि व्याट र स्टम्प हस्तान्तरण गर्नुभएको हो । खेलकुदमा रुचि राख्ने छात्रछात्राले विद्यालय परिसरमा क्रिकेट खेल्ने अभ्यास गरिहेका छन् ।