मोदी र सरिफलाई मलालाको निम्तो

लण्डन, आश्विन २६ - सबैभन्दा कम उमेरमा नोबेल शान्ति पुरस्कार प्राप्त गर्ने पाकिस्तानकी मलाला युसुफजाईले बालअधिकारका लागि भारतका कैलाश सत्यार्थीसँग यस पुरस्कार साझेदारी गरेपछि शान्तिका लागि उच्चस्तरीय पाइला चालेकी छन् ।  

बेलायतमा अध्ययन गरिररहेकी १७ वर्षीया मलालाले पटकपटक युद्धमा होमिएका भारत तथा पाकिस्तानका प्रधानमन्त्रीलाई १० डिसेम्बरमा ओस्लोमा आयोजना हुने पुरस्कार वितरण समारोहमा आमन्त्रित गरेकी छन् । उनले पुरस्कार साझेदार ६० वर्षे सत्यार्थीलाई भारतीय प्रधानमन्त्रीसँग यस बारेमा कुरा गर्न आग्रह गरेकी छन् ।

मलालाको आग्रहअनुरुप प्रधानमन्त्री नरेन्द्र मोदीलाई अनुरोध गर्ने बताए । तर, यो राजनीतीक र कुटनितिक मामिला भएकोले आफूले यस बारेमा स्पष्ट रुपले केही भन्न नसक्ने बताए । सन् २०१२ मा पाकिस्तानको स्वात उपत्यकामा घरनजिकै तालिवानले टाउकोमा गोली प्रहार गरेपछि उपचारका लागि बेलायतमा ल्याइएकी मलाला सुरक्षा कारणले स्वदेश फर्केकी छैनन् ।

उनले सहविजेता तथा बालश्रमविरुद्धका कार्यकर्ता सत्यार्थीप्रति श्रद्धा व्यक्त गर्दै यस महत्वपूर्ण समयमा मोदी तथा पाकिस्तानी समकक्षीलाई आफूहरूको विजय उत्सव मनाउन कार्यक्रममा सहभागी हुन आमन्त्रण गरेकी छन् ।  मलालाले उच्च सम्मानसहितको पुरस्कार प्राप्त गरेकोमा उनको गृहनगर मिंगोरामा नाचगान तथा मिठाइ बितरण गरी खुसी मनाइएको छ ।

मलालासँगै विद्यालयमा पढ्ने आयासा खालिदले यो पुरस्कार मलालाले मात्र जितेको नभइ सारा मुलुकले जितेको र उनी आफूहरूको आाखाको प्रकाश तथा मुटुको आवज भएको बताइन् । उनले मलालाले विद्यालयलाई विस्फोट गराएर शिक्षा बन्द गर्न सकिन्न भन्ने प्रमाणित गरिदिएको धारणा राखिन् ।

उनी २२ अक्टोबरमा क्यानडा जाने र त्यहाँको मानार्थ नागरिक बन्नुहुने प्रधानमन्त्री स्टिफन हार्परले बताए । यो जानकारी नोबेल पुरस्कार घोषणा भएपछि दिइएको हो । मलालालाई क्यानाडाले एक वर्ष अगाडि मानार्थ नागरिकको सम्मान दिएको हो । यसअघि दलाइ लामा, नेलसन मन्डेला र आङ सान सु की पनि यस मुलुकको मानार्थ नागरिक बनिसकेका छन् ।