प्रवासी नेपाली मञ्च युएइको अधिवेशन सम्पन्न

युएइ, फागुन ११– प्रवासी नेपाली मञ्च युएईको तेस्रो अधिवेशन सम्पन्न भएको छ ।


वैदेशिक रोजगारीका लागि युएईमा पुगेका नेपालीहरुको दुवईमा भएको अधिवेशनले प्रकाश कोइरालाको अध्यक्षतामा नयाँ कार्यसमितिको निर्वाचन गरेको छ । नयाँ कार्यसमितिको उपाध्यक्षमा महेश गिरी, गिरमान थापा मगर र मोति राई, महासचिवमा उत्तम अधिकारी, सचिवमा भेषराज ढकाल र पुर्षोत्तम सुवेदी, कोषाध्यक्षमा राजु गुरुङ्ग निर्वाचित भएका छन् । सदस्यहरुमा कृष्ण भुसाल, भीमबहादुर गुरुङ्ग, युवराज भुसाल, रामकुमार ढुंगेल, सीता भुर्तेल, दामोदर दाहाल, रोहितकुमार रावत, श्रीकृष्ण रावत, बिक्रम रावत, खुमानन्द अर्याल, इन्द्रबहादुर घिमिरे, रुपकनारायण नकर्मी, रामबहादुर रिमाल र मनोज अर्याल रहेका छन् ।


अधिवेशनको उद्घाटन गर्दै नेकपा एमालेका प्रवास इन्चार्ज भीम रावलले काँग्रेस सहमतिबाट पछाडी फर्कदा सरकार विस्तारमा ढिलाई भएको बताउनुभयो । उहाँले हाराहारीको जनमत पाएको नेकपा एमालेलाई विश्वासमा नलिएर सहमति भैसकेको गृहमन्त्रीमा अल्झदा सुशिल कोइराला नेतृत्वको सरकारले पूर्णता पाउन नसकेको बताउनुभयो । एमाले नेता रावलले मुलुकमा राजनीतिक अस्थिरता हुँदा लाखौँ युवा विदेशमा आउनु परेको यर्थाथतालाई आत्मसात गरी स्वदेशमै रोजगारीको व्यवस्था मिलाउनुपर्नेमा जोड दिनुभयो ।


कार्यक्रममा नेपाली राजदूत धनन्जय झा, जन सम्पर्क समिति युएईका अध्यक्ष चित्र केसी, जनप्रगतिशील मञ्चका अध्यक्ष हेमन्त पौडेल, नेपाली समाज युएईका अध्यक्ष ज्ञानेन्द्र कार्की, गैर आवासीय नेपाली संघका अध्यक्ष कृष्ण भुसाललगायते नयाँ कार्यसमितिलाई बधाई दिनुभयो । अधिवेशन अध्यक्ष यमलाल शर्मा पंगेनीको अध्यक्षतामा भएको थियो ।